Каракол шаарындагы мектеп паркы

КЫЙМЫЛ ЖАНА ЖАШОО

КАРАКОЛ ШААРЫНДАГЫ МЕКТЕП ПАРКЫ

Алдаяр уулу Мойт Аке атындагы №1-Инновациялык мектеп-гимназиясынын мугалимдери жана окуучулары

Каракол шаарынын активдүү тургундары жана Мэриясы

SILK командасы менен биргеликте Америкалык Борбордук Азия Университетинин (БААУ) "Шаардык пландоо жана дизайн" программасынын мугалимдери жана студенттери

Долбоор Каракол шаарынын активдүү тургундарынын, Алдаяр уулу Мойт Аке атындагы №1-Инновациялык мектеп-гимназиясынын мугалимдеринин жана окуучуларынын, Социалдык Инновациялар Лабораториясы Кыргызстан (SILK) командасынын, "Шаардык пландоо жана дизайн" программасынын мугалимдеринин жана студенттеринин, Америкалык Борбордук Азия Университетинин (БААУ) Мэйкер Спэйс билим берүү борборунун жана Каракол шаарынын Мэриясы менен биргеликте блогер-инфлуэнсерлер Алтынай Юсупова менен Кайрат Адигенеевдин колдоосу менен ишке ашырылууда.

Каракол шаарынын борборундагы №1-мектебинин алдында, Коенкозов жана Жамансариев көчөлөрүнүн кесилишинде, Совет учурунда орнотулган, бетинде Кыргыз ССРинин гербинин издери калган эски стела азыркыга чейин турат. Стеланын айланасында кызыктуу, чоң мүмкүнчүлүккө ээ болгон жашыл бурчтук аянт пайда болгон, ал окуучулардын жана шаар тургундарынын, жакынкы аймактардын жашоочулары менен калаага келген коноктордун эс алуусу, жолугушуулары жана ар кандай активдүүлүктөрү үчүн ыңгайлуу жай боло алат.

Төмөнкү сүрөттөрдө мектептин айланасындағы аянттын жайгашкан жери жана учурдагы абалы көрсөтүлөт.

Бардыгы коомчулуктан башталат

Биз Алдаяр уулу Мойт Аке атындагы №1-Инновациялык мектеп-гимназиясынын жогорку класстарынын окуучулары менен жолугушууларды өткөрүп, келечекте бул аянтты кантип колдонсо болорун жана алар ал жерден эмнени көргүсү керектигин талкуулап, ойлорду жараттык. Талкууга 30 окуучу катышып, алар 4 топко бөлүнүп, өз идеяларын сунушташты. Окуучулар сунуштаган идеялардын негизинде, биз эскиздүү долбоорду иштеп чыгып, эртеси күнү Каракол шаарынын мэри Тимур Мисирович Мадяровго, мэрия кызматкерлерине жана окуучуларга сунуштадык.

Төмөндө аянтты бөлүү пландары жана ар кандай активдүүлүктөр үчүн аймактар көрсөтүлгөн.

Ошондой эле, эскиздүү долбоордун 3D моделинин видеосу жана сүрөттөрү менен тааныша аласыз.

Долбоор камкор тургундар тарабынан чогулган акча каражаты жана Каракол шаардык мэриясынын колдоосу менен ишке ашырылат. Сизден да өз салымыңызды кошууну суранабыз. Бардык каражаттар курулуш материалдарын сатып алууга жумшалат. Курулуш иштери биздин борбордун активисттери жана Каракол шаарынын тургундары тарабынан жүргүзүлөт.

Сиз инфлуэнсер, Америкалык Борбордук Азия Университетинин (БААУ) урбанистика боюнча магистратура программасынын бүтүрүүчүсү Алтынай Юсуповага акча которо аласыз. Ал биздин былтыр бүткөн биринчи долбоорго –Бишкек шаарындагы чөнтөк паркына дагы каражат чогулткан. Ошондой эле, сиз биздин Бишкек шаарынын 9-кичирайонундагы экинчи коомдук мейкиндик долбоорубуз менен да тааныша аласыз - Театр 9.

Курулуш 20-июнда башталат. Сиздерди да бищге кошулуп, өз колуңуз менен салым кошууңуздарды суранабыз!

БИЗ БИРГЕЛИКТЕ СҮЙҮКТҮҮ КАРАКОЛ ШААРЫН МЫНДАН ДА КООЗ КЫЛА АЛАБЫЗ!

Биз менен байланышуу:

Электрондук почта: silk@auca.kg
Телефон: +996998654007
Социалдык тармактар: : Facebook | Instagram